STEAM – Programojmë të ardhmen Dita përmbyllëse e Javës së Projekteve – Nga ideja te prezantimi! Sot, në Shkollën “Mileniumi i Tretë”, përmbyllëm një javë plot hulumtim, krijimtari dhe bashkëpunim me prezantimet finale të projekteve të nxënësve. Gjatë gjithë javës, nxënësit punuan në grupe, provuan zgjidhje dhe i zbatuan njohuritë në praktikë. Aktivitetet brenda shkollës, vizitat edukative jashtë saj, takimet dhe trajnimet e pasuruan këtë rrugëtim me përvoja të reja. Këtë vit, dita e prezantimeve erdhi në një formë ndryshe: me “pasaportën e projekteve”! Në çdo projekt që vizitonin, nxënësit merrnin një vulë dhe mblidhnin mesazhet e tij. Çdo ndalesë ishte një mundësi për të zbuluar, për të pyetur dhe për të mësuar nga puna e njëri-tjetrit. Në kuadër të projektit “Ngjyra pa kufij”, sot u organizua edhe një ekspozitë me shitjen e sendeve të punuara nga nxënësit. Me kontributin e prindërve, stafit dhe organizatave të ndryshme, përfshirë KFOR-in, u mblodhën 500 euro për OJQ-në “Dëgjo zërin tim”. Një nismë ku puna krijuese u kthye në mbështetje për të tjerët! Krahas projekteve, aktivitetet sportive gjatë javës sollën argëtim dhe emocione për nxënësit. Ato u përmbyllën me një lojë volejbolli me stafin e shkollës, mes energjisë, të qeshurave dhe frymës ekipore. Faleminderit nxënësve, stafit, prindërve dhe partnerëve për përkushtimin dhe kontributin në këtë javë! E përmbyllëm me projekte të realizuara, përvoja të përbashkëta dhe shumë arsye për t’u ndier krenarë për nxënësit tanë!

STEAM – Programojmë të ardhmen Dita e katërt e Javës së Projekteve – Përvoja që hapin horizonte! Sot po ndajmë pak nga puna e nxënësve të klasave X–XII, të cilët po i kthejnë njohuritë në përvoja praktike përmes projekteve të tyre. Një prej tyre ishte projekti trajnues “Loja e mikrobiznesit”, ku nxënësit njohën më nga afër botën e sipërmarrjes dhe e kurorëzuan këtë përvojë me certifikim! Në kuadër të projektit “The Career Compass”, nxënësit vizituan Departamentin e Gjuhës dhe Letërsisë Angleze të Fakultetit të Filologjisë të Universitetit të Prishtinës. Përmes përgatitjes së CV-ve, letrave të motivimit dhe intervistave simuluese të punës, të organizuara nga studentët, ata ushtruan aftësitë për hapat e ardhshëm akademikë e profesionalë. Takimi me eksperten amerikane Jeanne Guerrero i nxiti të reflektojnë mbi interesat, aftësitë dhe zgjedhjet e tyre për të ardhmen. Çdo projekt u jep nxënësve hapësirë të zbulojnë çfarë i frymëzon, të provojnë veten dhe të mësojnë përmes përvojës.

5 Nëntori - Dita Ndërkombëtare kundër Dhunës dhe Bullizmit në Shkollë, përfshirë Cyberbullying Në shenjë të kësaj dite, në shkollën tonë u zhvilluan aktivitete edukative dhe ndërgjegjësuese me nxënësit e klasave I-V, në bashkëpunim të ngushtë ndërmjet psikologes së shkollës dhe mësimdhënëseve. Përmes lojërave interaktive, aktiviteteve simbolike dhe lojës me role, nxënësit reflektuan mbi rëndësinë e empatisë, respektit, pranimit të dallimeve dhe mbështetjes ndaj njëri-tjetrit, duke mësuar të dallojnë shakanë nga bullizmi dhe të reagojnë me përgjegjësi ndaj tij. Besojmë se një shkollë e sigurt dhe miqësore ndërtohet çdo ditë, përmes kujdesit, mirëkuptimit dhe bashkëpunimit të të gjithë komunitetit shkollor.