Vendet e lira për regjistrimin e nxënësve në vitin shkollor 2009/10.

Regjistrimi në klasat 1-9

1.1. Në klasat 1-9 mund të regjistrohen të gjithë fëmijët e moshës 6-15 vjeç, pa asnjë diskriminim në bazë kombëtare, etnike, fetare, gjinore, racore, sociale, gjuhësore, rajonale, etj., me kusht që t'i plotësojnë kërkesat e veçanta për regjistrim, siç janë:

• Aftësitë psiko-fizike për vijimin e shkollimit të rregullt.
• Mosha adekuate për regjistrim në klasën e parë, respektivisht kryerja me sukses e klasës paraprake sipas planit dhe programit mësimor të Kosovës ose një plani dhe programi mësimor të pranuar nga MASHT me aktin e licencimit, barasvlerës, apo me ndonjë akt tjetër juridik të aplikueshëm në Kosovë.
• Nënshkrimi i kontratës së shkollimit nga ana e prindit ose e kujdestarit të nxënësit dhe kryerja me rregull e obligimeve që dalin nga kjo kontratë.
   

1.2. Deri më 31 mars Shkolla shpall vendet e lira për regjistrimin e nxënësve të rinj në vitin shkollor vijues. Shpallja bëhet në mjetet e informimit publik ose në mënyra të tjera të përshtatshme.

1.3. Regjistrimi i nxënësve të rinj për vitin shkollor vijues fillon në prill dhe vazhdon deri në fillim të vitit shkollor respektivisht deri në plotësimin e vendeve të lira.

1.4. Regjistrimi i nxënësve të rinj bëhet me përparësi sipas radhës së paraqitjes.

1.5. Regjistrimit të nxënësve në klasën e parë i paraprin biseda me psikologun me qëllim të përcaktimit të shkallës së zhvillimit psiko-fizik të nxënësit.

1.6. Regjistrimit të nxënësve në klasat e tjera i paraprin biseda/ testimi nga psikologu me qëllim të përcaktimit të shkallës së zhvillimit psiko-fizik dhe të zhvillimit të të nxënit, të nxënësit.

1.7. Regjistrimi i nxënësve aktualë të Shkollës "Mileniumi i Tretë" në vitin shkollor vijues bëhet deri më dt. 10 qershor. Pas kësaj date vendet e nxënësve të paregjistruar shpallen të lira.

1.8. Kontratat për shkollim për të gjithë nxënësit e regjistruar në vitin shkollor vijues duhet të nënshkruhen më së voni deri më 15 korrik. Mosrespektimi i këtij afati do të konsiderohet si heqje dorë nga regjistrimi.

 Regjistrimi i nxënësve të rinj në klasën 10

Të drejtë regjistrimi kanë të gjithë nxënësit e moshës nën 17 vjeç, të cilët i plotësojnë këto kushte:

kanë mbaruar shkollimin fillor dhe të mesëm të ulët, ose shkollimin e barasvlershëm,
nuk kanë bërë shkelje të rënda disiplinore gjatë dy viteve të fundit të shkollimit fillor dhe të mesëm të ulët.
Shkolla e mesme e lartë (klasat 10-12) do të funksionojë sipas planprogramit mësimor të Kosovës, duke ofruar mësimin në dy drejtime:

     1. Gjimnazi Matematikë-Informatikë,
     2. Gjimnazi i shkencave shoqërore.

Për më shumë informata shkarkoni dokumentin e veçantë.

Për nxënësit do të organizohet testi pranues në këto lëndë:

• Gjuhë shqipe – deri në 40 pikë,

• Matematikë – deri në 40 pikë,

• Gjuhë angleze – deri në 20 pikë.

Pyetjet do të jenë nga plani dhe programi mësimor i Kosovës.

Shkarko modelin e testit pranues


Rangimi i nxënësve dhe pranimi i tyre në drejtimin përkatës do të bëhet sipas rezultatit në provimin pranues. Shkolla do të bëj përpjekje maksimale që secili nxënës i ranguar të regjsitrohet në drejtimin e zgjedhur, por, nëse nuk ka mundësi për këtë do të ofrohet regjistrimi në drejtimin tjetër.


Fletëparaqitjet për regjistrim në klasën e dhjetë pranohen deri më 19 qershor 2009.

Dokumentet e nevojshme


Testi pranues mbahet më 20 qershor 2009 me fillim në orën 10.
 

2.1. Çmimi bazë i shkollimit për një vit, përfshirë edhe tekstet mësimore, është

    1) Për regjistrim në klasat 1-9 - 2,085 EUR,
    2) Për regjistrim në klasën 10 – 2,300 EUR

Çmimet përfshijnë TVSH-në.

Kjo shumë paguhet në tri këste: me rastin e nënshkrimit të kontratës, në fillim të gjysmëvjetorit të parë dhe në fillim të gjysmëvjetorit të dytë. Për regjistrimin e fëmijës së dytë, Shkolla ofron zbritje prej 10%, ndërsa për regjistrimin e fëmijës së tretë zbritja është 20%.

2.2. Me rastin e regjistrimit të nxënësit për herë të parë në klasat 1-9 bëhet pagesa e paradhënies në shumë prej 85 EUR. Kjo shumë zbritet nga kësti i parë i pagesës.

2.3. Shkolla ka lidhur marrëveshje me dy kompani - me restorantin “Gurra” për sigurimin e ushqimit, dhe me kompaninë transportuese “Trio Trans” për ofrimin e shërbimeve të transportit të nxënësve. Për vitin shkollor 2008/09 restoranti “Gurra” ofron mëngjesin me çmim prej 15 EUR/muaj dhe drekën me çmim 40 EUR/muaj; ndërkaq “Trio Trans” ofron transportin nga çdo pikë brenda qytetit deri në shkollë dhe anasjelltas me çmim prej 25 EUR/muaj. Shfrytëzimi i këtyre shërbimeve nuk është i obligueshëm. Shkolla nuk është ofertues i këtyre shërbimeve, nuk e bën inkasimin e mjeteve as faturimin për këto shërbime dhe nuk merr asnjë përgjegjësi për ndryshimin eventual të çmimeve.

NLB ofron mundësi kreditimi për pagesën e shkollimit për të gjithë klientët e vet me afat kthimi prej 12 muaj dhe kamatë vjetore prej 11%.


 

Klasa e parë

• Fletëregjistrimi i plotësuar (M3-R1)

• Certifikata e lindjes

• Fotokopja e një dokumenti të identifikimit të prindit ose të kujdestarit
• Për fëmijët nën moshën minimale të arsimit të detyruar edhe vërtetimi i mjekut dhe i psikologut
• Pagesa e paradhënies për regjistrim në lartësi prej 85 EUR. Kjo shumë zbritet nga kësti i parë i pagesës për shkollim, respektivisht kthehet nëse konstatohet se fëmija nuk i plotëson kushtet psiko-fizike për shkollim të rregullt.

Klasa II-IX – regjistrimi i parë

• Fletëregjistrimi i plotësuar (M3-R2)
• Certifikata e lindjes
• Fotokopja e një dokumenti të identifikimit të prindit ose të kujdestarit
• Fletëkalimi ose dëftesa nga shkolla ku fëmija e ka mbaruar klasën paraprake
• Pagesa e paradhënies për regjistrim në lartësi prej 85 EUR. Kjo shumë zbritet nga kësti i parë i pagesës për shkollim.

Klasa e dhjetë

• Fletëparaqitja e plotësuar (M3-R3)
• Dëftesa për përfundimin e shkollimit fillore dhe të mesëm të ulët ose vërtetimi se nxënësi vijon vitin fundit të shkollimit të obligueshëm (klasa 9),
• Fotokopja e certifikatës së lindjes së nxënësit,
• Një foto e madhësisë së pasaportës
   

Ballina | Për ne | Nxënësit| Letër Informative | Lajme | Kontakti

Copyright © Qendra për Arsim e Kosovës